Travel 。CaKe

上星期日參加咗一個母乳講座班. 原來今年真係好多人生bb, 宣傳單寫著名額只限15人, 但當日出席的, 粗略估計也有50人, 係講座裏面, 更加比我撞到兩位朋友, 有一個預產期只係早我一星期咋, 真係"橋"啦! 

其實未聽講座前, 真係對餵母乳一知半解, 點餵?唔識. 食幾多?唔識. D輔助儀器點用? 都唔識... 不過聽完之後, 就開始有點了解...

經過三位餵哺母乳達1-2年的媽媽分享後, 她們一致認為"無可能話無奶的! 只係你有無耐性及恒心而已!" 佢地既角度話, 母乳係天賦的餵哺功具, 如果唔係, 以前無奶粉, d人點餵奶? 最多只有量多或少之分, 有d人可能bb一出世便有奶, 有d可能要2-3日或者一星期才可以上奶. 無可能話完全無的! 

食物是可以增加奶量
>> 多吃米飯, 增加身體嘅熱量, 自自然會制造多些奶.
>> 多渴水, 炒米茶(坐月期間) , 豆漿(熱), 多奶花茶... ...
>> 多渴湯水 (木瓜魚尾湯, 花生雞腳湯, 花膠雞湯...)
>> 禁食收奶食物 : 乳鴿, 豬潤, 淡豆豉. 

不過點都好, 最緊要係早d刺激乳頭, 等佢有個signal知道有bb需要人奶, 咁先可以令身體不斷增加奶量. 所以, 產前的乳房按摩是很重要的, 所以有時間的話, 最好每天按摩乳房數分鐘. 另外, 當bb出世後, 最好在未離開產房前, 給bb飲第一啖的初乳 (俗稱"黃金初奶"), 一嚟話黎一口黃金初奶有營養, 可以幫助bb排去胎糞, 二嚟可以刺激身體, 盡快制造母乳 (** 跟據三位母親的經驗, 公立醫院可以在產房內給bb吃母乳, 但私家醫院係無黎個安排的)

****************************************************************************************

到媽媽推離產房進入產後病房後, 如果已經通知護士你係餵人奶的話, 護士便會安排bb推到你的床位給你餵哺, 如果你唔識餵, 護士都很樂意教導的.

餵哺母乳的方法 
>> 用枕頭或哺乳枕放在腰間, 把bb放在上面, 用手指托住它的頸及頭
>> bb唔好著太多衫, 因為佢都要空間郁動. 
>> 把bb的頭仔靠近媽媽的乳房.
>> bb就會將大口準備食奶 (初生bb的自然反應), 當佢個口將到最大時, 就要立即bb的口放到乳房, 將整個乳暈部分摭蓋, 咁bb就會慢慢吸啜母乳. ( 如果bb嘅口只包住乳頭部分, 其實係吸食唔到架, 而且仲會咬傷乳頭, 所以要盡量蓋住乳暈部分)
>> 如果bb咬住乳頭, 我地可以用手指尾放入"Liu 一 liu" bb下頜, 等佢吸食唔到母乳後便會鬆放. 再等佢張大口後, 就可以繼續餵哺.
>> 如果bb食食下瞓著咗, 我哋可以liu吓佢腳板底, 等佢醒返再食.
>> 其實初生bb個胃只有一個$5硬幣咁大, 所以唔洗食好多, 夠就ok, 所以初生bb既食量較少, 而餵哺次數就較多.
>> 初生bb可以每邊乳房都餵哺約15分鐘, 咁樣可以令兩邊乳房都上到奶. 到差不多一個月後, 如果上奶情況ok的話, 可以餵哺一邊, 另一邊就泵出黎留作下一餐飲用.
>> 如果不幸被BB咬傷乳頭, 不用擔心, 只需要係傷咗既乳頭上搽少少母乳, 到第二日就會好快, 可以繼續餵奶. 
>> bb食完奶後, 要將多餘的奶泵出, 如果唔係乳線好容易閉塞, 造成發炎.

****************************************************************************************

根據三位媽咪的分享, 當你上奶後, 姿勢及方法正確的話, 餵母乳就沒有問題. 母乳是最天然最好的初生嬰兒食品, 含有豐富的抵抗力及營養, 減少bb疾病的機會 (人奶bb好少有濕疹出現), 所以外國都建議餵哺母乳2年, 最少都要6個月, 咁bb就會健健康康. 同埋, 唔好以為人奶bb大便無奶粉bb咁好, 有一位媽媽分享, 佢個囝囝成20日無大便(正常3-4日無大便都有問題), 不過摸佢肚仔又無肚谷谷既情況, 而且食得瞓得, 醫生檢查過都話無問題. 咁係因為母乳的成份夠天然, 容易被人體吸收, 咁如果bb完全吸收晒d養份, 咪唔會有無便便羅, 所以其實人奶真係比奶粉好. 但係... 要餵2年, 就算6個月都唔係易事, 因為現今好多媽咪都要返工嘛. 咁點樣泵奶? 泵奶時間點分配呢???

為上班後泵奶作好準備
>> 如果是富媽媽(奶量多), 不妨在每次bb飲完奶後, 將多餘的奶泵入儲奶袋, 寫上泵出日期/時間, 並放入冷格雪起, 一般情況下, 冰奶(放在冰格的奶)可儲存2個月, 而雪奶(放在下格)可以儲存48小時, 室溫奶就6-8小時. 你可以視乎你的需要而選擇把泵奶放在冰格或下格.
>> 坐奶最佳溫度是40度, 太高溫會令營養消失. 所以最好購買一個坐奶器.
>> 冰奶可先放在下格解涷6-8小時才座溫.
>> 如果是窮媽媽(奶量不算多)的話, 不妨每天多泵幾次奶, 刺激乳房, 令身體有個SIGNAL知道要制造多d奶, 咁慢慢奶量就會增加.
>> 泵奶器有分手泵及電泵兩款. 手泵是人手用力, 所以速度較慢, 所需時間較長, 電泵速度就會快d, 如果是返工泵奶的話, 最好用電泵. 奶量約30分鐘6-8OZ (視乎情況, 只作參考)
>> 最好在返工前一星期試練習一下泵奶及嘗試用奶樽餵奶. 如果計劃在早午晚泵三次的話, 就要編排一個時間表, 如: 7AM, 1PM, 8PM進行泵奶, 等身體習慣了, 知道這三段時間是需要奶的. 另外, 要慢慢比bb嘗試用奶樽, 習慣吓, 咁就唔洗怕bb唔肯飲奶樽奶 (有些bb慣咗"埋身餵"就唔鍾意飲奶樽奶)
>>返工後, 可能因為工作多及壓力大而減少奶量, 所以, 初頭可以多泵幾次, 以保持奶量.
>> 淩晨00:00 - 03:00身體會有一種"催乳素" 所以如果可以安排在這幾個鐘內泵一次奶, 可以增加奶量.
>> 如果半夜有谷奶情況, 最好都泵少少奶出來, 一來可以減少谷奶情況, 二來不會給與身體一個錯誤的Signal -> 奶量過多, 叫身體制造少D
>> 有時可能泵泵下無奶, 但2分鐘後又會有奶的. 這是因為身體受刺激而再一次制奶.
>> 可以多買一對泵奶喇叭, 這樣就不用每之泵完之後就即洗. 

****************************************************************************************

在公司泵奶遇到的問題
>> 公司可能無泵奶地方, 咁可能要去廁所泵, 如果去廁所泵的話, 就要小心衛生, 洗完手後, 手不要掂其他野, 另外, 泵奶器具要小心放好, 如果不小心跌咗落地下就麻煩了. (有一位媽咪試過一次好唔小心把泵奶蓋跌咗落地, 最後把器皿放入密實盒加少少溫水, 放入微波爐"叮"一會, 抹乾後才用.)
>> 如果公司附近有母嬰健康院/家計會, 可以考慮去果到泵奶. 
>> 最好買一個冷涷袋, 這樣泵出黎既奶就可以立即雪好, 回家途中也可以保持溫度, 不致變壞. (冷涷袋最好長期放入冰格)
>> 在公司/廁所泵奶, 可能會聽到一些閒言閒語, 要作好心理準備, 告訢自己, 你係做緊一件好偉大既事, 咁就唔洗理會d不必要嘅閒言.

聽完嚟個講座之後, 真係知咗好多野, 雖然我都未100%認同每個人都有奶(因為身邊的確有朋友試過, 最後都無的), 不過, 到期時我都會試吓嘅, 希望一齊順利吧.