Travel 。CaKe

Week 23-24

~過完年之後，突然覺得個肚脹咗好多。過年前著嘅鬆身衫，唔留心睇其實唔覺得有個“大肚“係到，但過年後，明顯地件衫係隆起咗少少。keke...Beku正努力成長！

~每星期都會嘔1  -2次，不過好好了，因為只在朝早食早餐前嘔，即只係嘔白泡＆黃膽水，相比起食完野先嘔，好好多了！ 不過，我究竟幾時先完全唔嘔呢？

~瞓覺時，一轉身便覺得大脾“拿“有D痛，上網見人講，側睡＆用cushion情況會好D。雖然唔覺有麥好轉，但我唸用咗總好過無用好啦。

~朋友送左成箱Beku用品比我，收到時真係好驚喜！我同老公好似尋寶咁，嘩！點解個箱入面可以有咁多野，攞極都仲有既？ 真係好多謝嚟位朋友，實在幫補唔少

~弊家伙！去健康院檢查，發覺我5星期重咗5KGS呀，即10磅有多，超晒標了（大約1週1磅就正常）！ 有D驚，點解突然重咗咁多，不過姑娘話，見我之前因為嘔吐而輕咗10磅就算啦，但都叫我要控制吓食量。其實，我又唔覺我食咗好多野喎．．．

Week 25-26

~肚圍有34.5吋啦！算唔算多？ 相比我未懷孕前嘅25-26吋腰，咪算多羅，但如果以大肚婆來說，又未算！我見有D同我同週數或週數細過我嘅，都已經有有35-37吋… 我嚟D，小兒科啦！ 咁係咪因為我個肚仲未好大，所以坐地鐵無嘜人讓坐呢？

~第一次感覺到Beku係肚內“掟彎“，好鬼大力，不過又好鬼棧，果種感覺難以形容，我唸，嚟D 就係胎兒同媽媽之間既密切關係。

~ 開始上產前運動班，覺得好有用，原來大咗肚之後，身體變化好大，唔好好保養及預防，生完之後真係會有好多毛病架。

~ 去私家醫生到覆診，嘩！好慘！5週重咗15磅！ 仲勁過上次去健康院磅，睇嚟，我真係要食少D薯片＆朱古力了！

~ 開心嘅，係Beku已經有910g，即剛剛2磅了！ 上次係私家醫生到照都只係得350g左右，估唔到，5星期後Beku重咗咁多呃。

~ 第一次去上產前講座，今堂嘅講者真係麻麻，講咗等於無講，無presentation skill，又無準備好，總之一句講晒－＞唔掂！ 老公仲剛剛今日陪我去上，點解嚟堂咁無聊，如果堂堂D講者都係咁，實在晒我時間。

~ 忍咗好耐，終於有機會食番杯雪糕了，好好味！ 我而家等緊夠8個月便可以食西瓜、付竹白果糖水＆綠豆沙啦，唸起都流口水呀

~ 見Jusco&Apita 大減價，夾過價後，我地開始為Beku用品入貨。我地由下午一點行到晚上八點，真係好累！ 不過經此一戰後，Beku嘅日用品都買得七七八八了！

Week 27-28

~上兩週無嘔到，以為唔會再嘔，點知．．．嚟兩個weeks又嘔，仲要食完飯先嚟嘔！ 一嚟嘔得辛苦，二嚟又晒鬼晒我D野食。真係呃！唉！不過嘔都可以代表Beku健康成長，唸到嚟到，個人就安心D！

~ 第二堂產前講座，題目係幼兒護理，嚟堂個講者有誠意好多，一嚟懂得制造氣氛，等我地無咁悶之餘又可以加深我地對幼兒護理既認知，二嚟佢真係講得好清楚，有問必答。上完堂後，去咗探朋友嘅初生BB，剛岩佢又要沖涼，咁我又可以睇多次BB沖涼過程，加深印象，希望到Beku出世時，我仲會記得＆識得點運用啦

~ 28週去咗照4D，好開心，又見到Beku個樣，今次個樣同上次係瑪麗睇明顯肥咗好多。Beku仲重咗，而家有1179g啦。醫生仲話Beku已經調咗頭（咁快？）不過又唔洗太開心住，因為咁早調頭，BB都有機會再調返轉，最緊要32-34週左右真係調咗頭嘅話，咁先可以100％肯定無問題，可以順產。

~ 肚圍增加咗1吋（即35.5吋啦）

~ 又四星期了，去健康院檢查，今次就4週重咗2.2KGS，算合格啦！