今朝淩晨發生了一次假陣痛的經驗!

大約淩晨三時左右,個下腹突然好痛好痛,好似M痛又好似肚疴痛咁,成對腳都酸軟晒無力,左瞓又唔得右瞓又唔得,試下去廁所睇吓係咪肚疴但又唔係喎!跟住唸會唔會係陣痛呢?不過佢嘅痛又唔係幾分鐘一次,係Keep住咁痛,最多中間停1分鐘咁又痛過,又唔似有規律性,所以雖然係痛,但我估又唔係陣痛果隻痛。不過老實講,上次我嘅規律性陣痛係來自催生針,所以我真係唔清楚自然性嘅陣痛會係點,所以果一刻都好慌,唔知入唔入醫院好?唔知叫唔叫阿媽來好?

到咗大約5 點,頂唔住叫醒船生話佢知,不過其實都無用,因為佢都幫唔到我,只係多個人傾吓分擔吓。後來唸住痛多一陣都唔得就叫阿媽嚟,跟住我就入醫院架啦!點知突然之間,由大痛變成少痛跟住我就瞓著咗,到大約7點起床的時候,個下腹都有D痛但已經無之前咁痛,而且無痛得咁密,大約係半小時痛一次。到咗8:30am左右,就打比阿媽叫佢過嚟先,睇吓到時情況我要唔要入院。

打完比阿媽之後,痛就由每30分鐘一次變成20分鐘, 之後就10分鐘一次,感覺真係好似陣痛咁有規律,但係呢,果種痛就唔算太痛,好似針拮咁,每次都拮我嘅左腹,痛幾吓就無事。我唸如果真係痛到每10分鐘一次嘅陣痛,應該唔會咁小兒科掛??? 果一刻個心真係15/16,又想入院睇吓麥原因? 但又怕攞晒D走佬袋去醫院已經麻煩,到時原來食咋糊就真係攞嚟攪!所以,後來阿媽嚟到,就唸住沖咗個涼再食埋飯先算!

點知... ...沖完涼之後個人已經無咁痛,又無咗10分鐘一次嘅針拮痛,反而只係無規律的間歇性痛楚。到食完飯去瞓一瞓,瞓醒後就真係麥痛都無晒!只係好偶然才會痛一次。

上次陀Beku都未試過假陣痛的,今次都算是新經驗!如果唔係有Beku係屋企,如果係第一胎的話,我估我一早就入去醫院了,一早就比人趕返出嚟了。唉!不過咁樣嘅經驗我真係唔想要,我寧願今次係真陣痛,真係痛完入醫院,生完就大工告成!唔洗擔心咁多!

唔知真陣痛幾時會出現呢???

arrow
arrow
    全站熱搜

    travelcake 發表在 痞客邦 留言(3) 人氣()