Travel 。CaKe

自生完Beku之後，個人成日都流好多汗，攪到成日都好似做完苦力咁，成身臭汗味。早排好似有幾日好D架，唔知點解嚟排瞓覺時成日出汗，有時D汗好似係咸，有時就係淡汗（出淡汗一定係身體虛所致），所以，都係要睇下中醫調一調先得。

上星期五，我就叫阿媽早D過嚟照顧Beku，咁我就去睇中醫，好在，中醫師打完脈之後，話我身體係虛，但虛得黎都仲有D跳動（我唸意思即仲有D氣色掛），咁都唔係十分之虛啫！ 不過醫師話我有D熱底，要清一清佢再慢慢調理喎。睇完中醫之後，我沒有即刻回家，而係比自已放鬆一下，去行吓街，減下壓（哈！無錯呀！我留係屋企都有個幾月了，日日都係照顧Beku，餵奶，泵奶，換片，睇住佢喊，發脾氣．．．）

先先去咗護協買Beku嘅日用品（哈！行街第一件事都唔係睇自已野，而係睇咗個囡D野先），跟住就坐地鐵去咗太古城，以最快嘅速度，買咗兩件大碼衫，一條產後褲，一個哺乳Bra Bra比自已，唉！係呀！我而家衣柜裏面嘅衫，全部都唔岩著，D褲完全扣唔到鈕，D衫就都著到嘅，但超級貼身羅，雖然生之前好多朋友都話我唔係肥好多，亦都唔算腫，但原來整個身型都不其然咁升咗起碼一個Size，真係估都唔唔到呀，我而家出街，都係著老公D褲，衫就著返大肚時著嘅衫咋！ 所以，真係要買返幾件大碼衫，唔係遲D返工咪無衫著？？？

我由下午兩點多出發，五點多便歸家，以三小時可以做到咁多野，已經好滿足了，返到屋企，又要續繼努大，照顧小Beku了！