Travel 。CaKe

執走佬袋真係好煩的一件事！因為樣樣都話要帶，又鬼死咁大件，仲要分開唔好一袋過（因為你入產房時，護士只會叫你帶邊幾樣野入去，其他都幫你鎖好晒，如果你Pack埋一袋，咁入產房前先左搵右搵就好麻煩！） 所以，雖然之前買走佬用品時已經張要用的放在一個大袋內，但要我認認真真地檢查清楚有什麼要帶？有什麼需要的？真係拖到而家先有心機去執！

其實早於第一次去醫院產檢時佢已經比咗份走佬袋Check List我，但總是覺得有不足，有時會叫你帶多咗D無謂野，有時需要的有沒有提及，加上間間醫院要求的都唔同，我上次去瑪麗生，今次去東區（因為近屋企，D人話第二胎快D喎，所以我都唔敢再走去瑪麗，怕又遇著黑雨功塞車，到時唔通係的士／地鐵生B咩？） 所以執走佬袋之前，都問過最近在東區生過的媽咪的個人經驗！

唉！雖然話每樣東西都帶少少，無必要就唔帶，但執吓執吓又真係執咗好多野，最衰係D床墊呀，尿片呀，M巾等都鬼死咁大包，論論盡盡咁！ 我總共執咗3袋呀！
第1袋 （大袋）－放晒所有個人及其他用品
第2袋（普通Size環保袋） － 放咗入產房用品（一包床墊，一包有扣M巾及一個水泡）*其實個水泡入產房唔洗用，只係個大袋已經無位放而已。
第3袋（細袋）- BB出院時的衣服。

我而家已經33週，仲有約個半月妹妹就出世了，雖說是第二胎，但都會有點緊張，有時都會驚會唸，唔知妹妹可唔可以順利出世？健健康康？唔知今次生產時會痛幾耐？雖然上次都唔算話生得快！但今次會更慢呃？還是更快？要剪呃定唔洗剪？定係撕裂呢？ 又唔知今次會唔會咁好彩有二等房住呢？ 又唔知今次遇著D助產士／護士／醫生係好定係... ...

嚟D係咪產前恐懼呢？

**************************************************************************************
分享走佬袋Check List（嚟份List我覺得不錯，好多細節野都有提及，我今次都係跟住嚟份來執！）

證件 － 自己身份證、老公身份証副本、產科覆診證 （包括醫院覆診卡及健康院紀錄卡）、紙筆和手錶（用來記錄陣痛資料）、錢／按金（Cash/Visa/EPS)

入院用品 －
產房袋 － 產婦衞生巾2包（ 1包有扣；1包無扣）、口罩（如需要）、床墊1包（大Size)
                （ *通常入產婦助產士只要求有扣衞生巾2包，但個人經驗1包已足夠。床墊最好買大Size，如瑪麗的要求，如果太細張佢會要求你買過。在醫院樓下的用品店買，價錢好貴！）

產後房袋－
1) 個人梳洗用品：牙膏＋牙刷＋杯；洗面及面霜；潤唇膏；梳；髮夾橡筋；洗頭水／沖涼液；肚紋羔。
（ 視乎個人需要，其實如果生完唔會用生水沖涼的話，基本上洗頭水／沖涼液都唔洗帶）。
2) 哺乳Bra； 即棄乳墊；網褲； 拖鞋；襪； 面巾（數條，生完好多汗）；大毛巾
（生完未必咁快上奶，所以即棄乳墊未必有用，但以防萬一可以帶定幾個。孕婦雖然大汗，但醫院的冷氣更大，基本上係醫院好少話會攪到成身臭汗。大毛巾如果自己無用，都可以暫作BB包被，以免因為醫院的冷氣大而冷親。） 
3) 廁紙；廚房紙（Kitchen Paper)；消毒棉花；沖洗器
（廚房紙真係好好用！可以用嚟代替紗巾餵奶，咁就可以減少係醫院要洗紗巾的問題；另外，用來如廁也不錯，因為紙質厚，一定唔怕有紙碎而引致發炎或抹唔乾淨的情況）
4) 保溫杯；鎖仔；吹氣水泡仔
（政府醫院的小櫃是要另外加鎖頭上鎖的，所以需要自己帶鎖仔把貴重物件鎖好！吹氣水泡仔好好用，尤其對陰道生產的孕婦，坐住佢傷口無咁痛！唔洗買好貴，買個最細Size嘅BB水泡已OK，最緊要係唔好100%吹氣，約60-70%便OK）
5) 手提電話＋叉電器＋相機

BB用品袋 －
紗巾6條（我用廚房紙代替，所以沒有帶紗巾）；初生尿片1包；濕紙巾1盒（換片用）；思詩槳濕棉數片（必要時用來幫BB抹面／手）；包被1張；羊毛底1件（怕醫院冷氣太大，不過我上次都無帶）

出院時才用的物資（可以在入院的第二天才叫家人帶去醫院）－
孕婦出院衫（我都係著返入院果套）
BB衣服（和尚袍內衣；長袍／夾衣；手套仔；腳套仔；包被；帽）