Travel 。CaKe

今年生日有麥攪作??? 就係用結婚週年黎換取今日老公可以有一日Whole Day Holiday陪我"去玩, 去顛, 去Ocean Park"啦.

點解一定要生日去海洋公園??? 因為生日免費嘛... 同埋海洋公園做緊Promote, 身份証有0字或3字都可以有折頭, 老公就有一個0字所以享有9折優惠, 咁抵, 我地無理由唔去架嘛

我地係屋企"me me mor mor"後, 大約10:00便出發, 坐地鐵到銅鑼灣轉巴士往海洋公園. 由於我地都好耐無黎個海洋公園了(我起碼有6-7年無黎個, 老公可能更耐), 對海洋公園既地理都唔係太熟, 所以我地買左票後就先攞將地圖睇下有麥地方好去. 最後決定先坐纜車上山頂的水母萬花筒. 

海洋公園應該曾經翻新過, 我記得幾年前黎既時候, D纜車係又殘又舊的, 車身上的油漆有部份已經甩色, 不過, 今次見到既, 全部都很新淨, 令人有一種煥然一新的感覺, 難怪能夠同香港廸士尼對壘.

今天既人潮不算多也不算少, 在纜車站我地等了約30分鐘才能夠上車, 而且還遇著3位很心急上纜車既中國同胞, 唉, 我都唔知佢地急D麥??? 而家海洋公園好識做生意, 係我地坐纜車之前, 佢地會叫我地影一張相, 之後比張紙仔我, 話上到山頂攞住張紙仔可以preview到頭先影果張相, 如果影得好可以買返張, 嘩! 不過好貴, 成$79一張相, 如果要相框仲要成$100, 雖然老公話買, 但我都覺得唔抵, 最後我地偷偷地影用自己相機影返張相, 咁... 咪可以留念, 知道自己曾經影過相咪得羅

往水母萬花筒既沿中, 你已經可以看到各種水母造型的植物或道具, 很Kawaii呢~~~雖然黎個館唔算大, 但裏面真的有很多不同類型的水母, 有好多我地見都未見過呀, 係不同顏色燈光既照射下, 真係好靚... 黎個館叫水母萬花筒. 真係無改錯名. 

黎款係又扁又大的水母, 佢地身上有4粒圓點, 係燈光照射下好鬼Shape~

而黎款呢, 佢D鬍鬚好鬼長架, 都唔知會唔會游游下D鬍鬚會唔會打晒結呢, 哈哈

黎個就有D似魷魚既化身, 個頭圓圓, D鬚又短短咁, 如果真係魷魚的話, 應該都幾好味架.

跟住我地去左鯊魚館, 果到D鯊魚無麥特別, 因為細個都去過, 見慣左了, 但最特別的反而係黎個啡帶竹鯊既BB標本, 一個係2個月一個係3個月, 我同老公研究左好耐, 究竟係真既鯊魚BB定係假既??? 最後我地一致認為佢係"真"架... 因為3個月果個對眼係識得郁架, 我地唸, 如果假既應該唔會做咁咁立體咁認真架??? 

去完鯊魚館, 當然唔可以錯過佢隔離果個海洋館啦, 海洋館真的很大很大, 裏面有很多品種的魚類, 大既有鯊魚, 魔鬼魚, 龍躉都有, 細既有小丑魚, 海馬... 真係唔明白, 點解D大魚同細魚可以咁和平咁係同一缸水裏面游, 大魚唔係食細魚架咩??? 

不過黎到最靚, 我覺得係D珊瑚礁, 點解可以有咁大舊既珊瑚礁架呢? 佢地點樣運黎架? 仲同個缸既size咁fit... 細個黎海洋公園都唔會唸咁多問題, 亦都唔鍾意黎海洋館, 點解而家會覺得咁amazing? 咁好奇呢? 哈哈... 黎D係咪話唔同階段有唔同既啟發呢?

好啦, 睇完海洋生物後, 我地開始去玩機動遊戲了, 我地先黎一個熱身, 玩一玩摩天輪浪漫一下先

雖然話人唔多, 但我地都排左30分鐘, 不過都值既, 因為係摩天輪望落黎既風景很美, 而且D風吹埋黎好鬼舒服, 可惜佢只係轉兩個圈, 都未享受夠就要落黎  

食完麥記後, 我就提議去玩過山車, 老公對機動遊戲無麥興趣, 佢話攞苦黎受喎, 點解要比錢人去嚇自己??? 咁又岩既, 不過, 我地入場費已經包左, 咁無理由唔玩嘛. 梗何況我真係好耐無玩了, 真係要回味一下. 不過, 而家既過山車已經無以前咁刺激(可能我地已經玩厭左, 對已經好舊款既過山車已經無麥感覺了)  你睇吓玩過山車同玩跳樓機既人, 佢地既表情都好唔同, 跳樓機果D真係玩得好刺激好鬼驚架.

老公原來未玩過越礦飛車喎, 咁我梗係要推介一下比佢啦, (順便陪下我玩嘛, keke...) 我地沿住山路去越礦飛車既位置, 沿途風景好靚, 我地一路欣賞風景之餘, 更比老公發現, 原來我地既步法係咁夾架~~~ 哈哈.

越礦飛車最吸引人之處, 係當整個路程你都可以見到好靚既海景(如果你仲有心情睇既話), 同埋佢果幾個由高急速向下的軌道... 果種"離心力"真係好勁呀, 老公都話好正. 玩完越礦飛車後, 我地就經自動扶手電梯返回太平洋海岸睇海獅. 原來, 太平洋海岸都有一個燈塔, 睇起上來有D似愛琴海的建築呀.

太平洋海岸館內有好多種類的海獅, 我地岩岩能夠見到訓練員餵緊一條海獅食下午茶(哈哈... 4點幾啦, 仲唔係下午茶~~~), 海獅小姐食完後仲開心到轉返兩個圈表演比大家睇添 睇完餵海獅後, 另一邊竟然有兩條海獅係到打架. 嘩!!! 扎晒馬咁, 好勁呀, 不過佢地兩個都係扮下野架0者, 並無發生任何"傷獅事件".

睇完海獅後, 我地都開始有D疲態了, 已經無精力再玩機動遊戲啦, 因此, 我地就決定坐纜車返山腳睇熊貓館. 熊貓館既鎮館之寶仍然係"安安"與"佳佳", 今次見佢地, 睇起黎乾淨左, 同埋, 無咁肥, 雖然都仲好大件, 但相比起幾年前既佢地, 已經叫做修身左同活躍左啦, 幾年前黎睇佢地, 真係賴到郁都唔郁, 只係識得瞓咋. 今次呢, 佳佳既表現比安安好, 因為全場我只係見到安安係到疴臭臭.    

但係佳佳呢, 就表演左砌竹庶及食庶, 嘩! 估唔到一條咁長咁硬既庶, 只要兩下功夫, 佳佳就將它砌成一件件慢慢享受. 勁呀!!!

睇完安安&佳佳後, 我地去埋恐龍館及阿瑪遜森林, 不過, 因為我地都好攰啦, 所以只係走馬看花咁睇一睇就算, 連阿瑪遜3D電影都無睇呀, 不過, 我竟然係阿瑪遜森林發現黎隻咁靚既紅鶴, 我從來都唔知海洋公園原來都有黎D小動物係到... 今次, 我終於發現, 原來海洋公園不只機動遊戲同海洋館, 原來還有其他藉得睇藉得玩既地方架

我地大約6點鐘離開海洋公園, 坐巴士出返銅鑼灣, 去到銅鑼灣第一時間要去一去許留山食生果及龜苓膏, 因為曬左成日及行左成日, 我地兩個都有D脫水了, 加上晏就食左個炸雞飽做午餐, 仲唔食返個龜苓膏, 真係想聽日喉嚨痛到出唔到聲? 

食完許留山之後, 我地就係銅鑼灣行左一陣. 由於我地兩個曬左成日都無麥胃口食野, 加上Happy 21^st 已經去赤柱食左好野啦, 所以今晚我都無麥特別要求. 最後, 我地決定去買幾件我想食既小蛋糕返屋企慶祝, 其中包括我好想好想食既BreadPaPa泡芙及朱古力蛋糕, 芒果布甸&Tirumisu條. 

返到屋企, 我地就先食左個泡芙, 嘩! 正呀, 好耐無食過了, 真係好好味, 佢個Custard Cream唔太甜岩岩好, 真係食2個都唔會覺得膩, 食完甜點之後, 老公就去煮晚餐比我食, 食麥??? 就係 --- 露荀蟹柳公仔面啦...

黎個晚餐唔係普通既公仔面晚餐, 因為黎個係出自老公雙手既, 又唔洗我理, 食完仲包洗碗添, 你話係咪好正呢 haha...