Travel 。CaKe

今年係我第一年去海洋公園哈囉喂, 初初都不以為已, 當去玩機動遊戲既心態去, 但原來事實並非如此. "哈囉喂"真係有好多鬼, 真係"嚇到你喊驚, 驚到你失聲"架

尋日我地一行13人於下午1730在海洋公園門口集合, 入閘前先商量一下策略, 睇下點玩先至可以避開人群, 盡量玩得最多最快為目標, 最後我地決定先坐纜車往山上, 先玩係集古村果邊既"血獄地府". 

好快我地就上到纜車, 並以4-4-5陣式分3架纜車上山lu, 由踏上纜車黎一刻開始, 就註定未玩夠就無得返轉頭啦.

上到山頂後, 我地就直奔往"血獄地府".  停停停!!!! 途中發現路邊指示牌話血獄地府及吸血彊屍舞會分別要輪候120mins, 咪即係2個鐘??? 返而荒廢校園只需要15mins, 所以我地立即改變策略, 先去"荒廢校園"

唔好睇荒廢校園既外型好似好流咁. 其實, 佢係全場最驚最多鬼最好玩場面最認真的一間鬼屋. 尤其是我, 雖然老公已經不斷去搵暗門搵鬼, 其他團友話佢係到破壞緊, 減少了驚嚇度, 但我都覺得好鬼驚, 因為唔知下一幕又有麥鬼走出黎嚇你. 玩完黎間鬼屋後, 我既熱力及濕身指度係*********** (因為驚到係咪出汗, 攪到件衫勁濕呀!!!)

係荒廢校園玩到大家都三魂唔見左七魄後, 大家竟然無晒方向, 行山路去集古村一帶既血獄地府, 而沒有行扶手電梯, 咁都岩, 行山路風景好D又有風, 咁可以等大家relax吓, 回下氣嘛.  一去到血獄地府及吸血彊屍舞會個心又開始驚啦, 你睇下? 佢地既外型幾咁陰深恐怖?

雖然話血獄地府及吸血彊屍舞會要排120mins咁耐, 但實際上唔洗咁耐, 我唸45mins 左右我地已經可以入場. 而且, 係等候期間, 我地岩岩可以欣賞到"黑夜女神招魂派對" 雖然內容有D無聊, 但論堆頭, 論製作都唔算差架, 而且可以令等候入場既人仕解下悶, 其實都幾好呃. 我地仲可以一睹聞名已久既黑夜女神添

可惜... 黑夜女神並未為我地帶來好運, 反而是惡夢的開始, 因為, 我地部相機既閃光燈無端端壞左, 成日detect到有一個外置既閃光燈, 攪到內置閃燈唔識閃, 點解? 點解會咁樣? 唔通真係咁邪????

因為相機閃燈壞左, 所以之後都無影到相, 其實除左鬼屋內, 沿途你都會發現唔少鬼怪係你身邊經過, 嚇你, 或扮鬼扮馬. 我唯一可以同大家分享到既就係黎個海盜鬼, 你睇, 造型幾咁認真???

聽朋友講, 今年既哈囉喂真係好鬼認真好鬼dum本, 6個全新既鬼屋真係同之前唔同, 勁好玩, 不過人實在太多了, 排隊都用左好多時間. 最後我地只玩左5個鬼屋, 幽靈焚化場就玩唔到了, 唔知入面又有幾多鬼? 有幾嚇人呢?

**************************************************************

最驚嚇 : 1st 荒廢校園 - 我地成班團友一致投佢一票
                    2nd 太凶異域 - 3D效果做得幾好, 不過係排隊最耐既一間鬼屋, 要有心理準備.

最無辜 : 係阿Ann... 話你地知, 老公唔係第一個比我拉後2-3米既人, 第一個受害者其實係阿ann, 哈哈, 係荒廢校園佢已經被害架啦, 我又係驚到拖住佢個背囊向後行左幾米架, 哈哈

最認真 : D鬼鬼無論裝扮同表情都好認真, 唔知落左粧既佢地個樣係點架呢? 應該唔會咁恐怖掛?

最攰 : 排隊!!! 係小小既空間排隊打蛇餅, 又熱又焗, 真係好辛苦... 攪到我今日成個人散晒... gym都做唔到, 可憐 下年如果再去都係要早D決定早D買快證.

海洋公園哈囉喂, 果然"嚇到你喊驚, 驚到你失聲" 

我今日就失左聲啦

P.S. 返到屋企部相機即刻無事, 原來係有粒防潮膠珠"攝"左入去外置閃燈果條槽到, 所以攪到部相機成日以為有外置閃燈. 但我唸極都唸唔明, 點解點膠珠可以攝到入去既???