Travel 。CaKe

黎個蛋糕用左足足3個小時(2.5小時做蛋糕, 0.5小時裝飾!), 雖然話就話係一個蛋糕, 但因為入面有兩款不同的慕思層(朱古力&榛子), 所以, 其實等同做左2個蛋糕咁. 

今次都係我第一次做2層慕思, 的確花費了不少時間. 另外做裝飾也很需時, 因為今次是朱古力果仁蛋糕, 唔想又係用生果裝飾, 咁唸住之前買左張轉印紙都未用過, 就開封試下啦... 一試之後, 我終於明白點解好多時做裝飾會用"假力" (假朱古力), 原因係... 用真朱古力係非常非常容易融化, 就算從雪櫃雪至硬崩崩, 取出後不消5秒就可以"未融係口, 先融係手"... 天呀!!! 攪到我有D"忟憎"!!! 好在, 最後左砌右砌, 終於做到一個合格的裝飾. 

我都係第一次整黎款蛋糕, 第一次整脆脆餅底, 參考左3個食譜結合而成, 希望好味啦! 而家正等緊老公放工返來切蛋糕一齊食. keke...  (不過唔知佢收幾點呢???)

朱古力榛子慕思蛋糕(6吋圓模)

脆脆餅底材料 :
朱古力 25g
榛子醬 50g
脆脆薄片 30g

朱古力蛋糕材料 : (用4吋圓模)
蛋1隻
糖 15g
低筋麵粉 4.5g
可可粉 4g

朱古力慕思材料 :
淡忌廉 38g + 25g
砂糖 7g
蛋黃 1隻
蛋白 1.5隻
70% 朱古力 65g
魚膠粉 4g
水 1 湯匙

榛子慕思材料 :
全蛋 1 隻
蛋黃 1 隻
淡忌廉 125g
榛子醬 60g
魚膠粉 4g
水 1 湯匙

做法 :
<脆脆餅底>
1. 朱古力及榛子醬隔水煮溶. 
2. 放涼後把脆脆薄片加入. (**一定要放涼, 否則脆片會變淋)
3. 壓在已舖保鮮紙的蛋糕模底內, 放入雪櫃待用. (**不要壓得太實, 否則會太硬.)

<朱古力蛋糕>
1. 以180度預熱焗爐.
2. 雞蛋打勻後, 加入砂糖以打蛋器打至企身.
3. 加入已篩的粉類. 快手攪勻.
4. 倒入模內, 以180度焗約12-15分鐘.  
5. 取出蛋糕後倒扣, 放涼後脫模切成2片.

< 朱古力慕思>
1. 蛋白以打蛋器打至起泡, 加入砂糖後打至企身.
2. 38g淡忌廉先以打蛋器打至慕思狀後, 加入(1)混合.
3. 朱古力切碎備用. 魚膠粉先以約1湯匙清水攪勻備用.
4. 蛋黃和餘下的25g淡忌廉隔水加熱後, 放入朱古力碎及魚膠粉, 充分攪拌至朱古力融化後, 加入(2)內快速攪勻.

<榛子慕思>
1. 淡忌廉打起備用, 魚膠粉加水座溶.
2. 全蛋及蛋黃一起隔水攪勻後加入榛子醬, 之後加入已打發好的淡忌廉.
3. 最後加入魚膠粉溶液攪拌. 

組合 :
1. 從雪櫃取出放有朱古力脆底的餅模, 先把一片朱古力蛋糕加入 (如果想保持蛋糕新鮮度, 可先用酒糖水塗抹蛋糕面及底層), 之後加入朱古力慕思, 然後再加一片朱古力蛋糕, 加入榛子慕思便完成. 最後可隨意裝飾蛋糕表面.

備註 :
1. 我用的酒糖水材料是 : 冧酒 + 砂糖 +清水
2. 如果用果仁做裝飾, 要先將果仁放入焗爐, 以100度焗約10分鐘, 這樣果仁的果香才會釋放出來及香口.

試食後 :
1. 朱古力慕絲朱古力味夠濃, 很好味, 不過慕思質地唔夠滑, 有待改良.
2. 榛子慕絲很香很滑, 不過質地較軟, 可以改多少少魚膠粉, e.g. 2g
3. 脆脆餅底一定唔可以壓得太實, 今次我黎個都實左少少. 不過放左4日, 個脆脆餅依然好脆. 正!