Travel 。CaKe

下個星期一就返工了，時間真係過得好快，雖然話日日對住阿囡，好似有D悶，但睇見佢日日長大，表情多多，開始識得同你玩時，真係有D唔捨得呀！好想繼續日日陪住佢，同佢玩，睇住佢成長！

返工前，好多野要準備，也計劃了返工後每天的schedule ! 媽媽已答應來我家照顧Beku，咁我放工後就要立即買餸返屋企煮飯！跟住我就會用僅餘嘅2－3個鐘陪Beku玩，餵佢食奶奶，換片等等。而我呢，也訂下了泵奶時間，每天4次，00:30; 06:00; 13:00; 19:00，係返工時間只泵一次，盡量減少對工作的影響，已試行了數天，應該無問題！ 不過到時，我一定要準時收工，如果唔係，我就趕唔切買餸，再返屋企泵奶了。

另外，返工前，真的好希望Beku可以戒夜奶，咁樣對我＆老公都好大幫助，因為半夜起身餵一餵奶真的很辛苦，如果可以戒掉的話，起碼我地可以連續瞓5－6小時。黎幾日係Babykingdom見有人睇“由零歲開始“黎本書，教人點樣為BB set 一個食奶schedule & 等佢可以自已瞓覺，唔好成日要人抱先肯瞓。我地前日開始試，而家餵奶係每三小時一次 （7am, 10am,  1pm, 4pm, 7pm, 10pm ... ...) 淩晨餵食時間我地無訂，希望Beku有咁耐瞓咁耐，真係唔需要餵就唔餵了，試行咗2日，第一日，Beku半夜兩點幾喊，跟住我抱住佢瞓可以瞓到清晨6點，算．．． 戒夜奶？ 但尋晚佢兩點多三點勁喊，跟住食咗120ml奶，咁．．．即係未戒到羅。好希望一切順利，Beku快D戒夜奶，咁到時我地就有覺好瞓了！