Travel 。CaKe

好耐之前已經想整黎個批, 但一直"dic"唔係心肝整, 星期日下午一個人在家, 本來唸住整黎做晚飯, 點知搓搓下皮時, 朋友打黎話約埋一齊出去食飯, 就咁... 個皮就放係雪櫃2日, 今晚先有機會整. 

因為中醫師叫我盡量唔好食蛋及雞, 所以, 我無依食譜加入雞蛋, 但原來無加蛋的話, D芝士係唔夠力Gel住D奶&忌廉的, 所以焗完之後唔係太實淨 ( 下圖 : 切開一件件後, 個批會"塔"左落黎), 都會有D奶水流出來. 如果想睇起黎靚D, 下次都係加返隻雞蛋了!

不過2個人食一個6吋芝士批真的有點膩, 下次要叫埋D朋友一齊試!

芝士火腿磨菇批

批皮 : (6吋批模)
低筋麵粉 90g
牛油 55g
水 15g
鹽 適量

餡料 : 
Mozzarella 芝士碎 
煙火腿
磨菇
洋蔥
鮮忌廉
鮮奶
蛋

做法 :
1. 牛油切小粒, 加入已篩低筋麵粉及鹽, 用手搓勻後, 慢慢分次加入水(如果太濕, 可落少D, 如果太乾就落多少少)搓勻.
2. 枱及木棍灑上少許高筋麵粉(材料外), 用木棍把麵糰搓薄後, 輕輕舖入批模內壓平,  把多餘的麵糰推走後放入雪櫃中冷藏約1小時
3. 焗爐預熱180度, 把批麵糰從雪櫃內取出, 用叉在麵糰上"吉"洞後, 以180度焗約10分鐘至批皮7成熟.
4. 用少許油起鑊後, 把洋蔥略炒後, 加入磨菇及火腿炒熟, 加少許黑胡椒及鹽調味後熄火, 平均舖在批皮上. 
5. 蛋打散後, 加入牛奶及忌廉攪勻後舖在批皮上再焗約20分鐘至表面金黃色便可. 

(食譜參考 : 蔡師奶菠菜火腿芝士批 及 Yves's Salmon & Dill Quiche)